PAGHULIP SA MAHALON NGA LAPTOP SA DEPED WAY LABOT SA WARRANTY

WALAY labot sa warranty ang pag-ilis sa mahalon nga laptop sa Department of Education, matud pa sa Country Manager sa Dell nga si Ronnie Latinazo. 

Si Latinazo giimbita sa Senate blue ribbon committee atol sa hearing sa pagpalit sa DepEd og mahalon pero karaan nga laptop pinaagi sa Procurement Service sa Department of Budget and Management (PS-DBM).

Gihataga sa Dell ang sakto nga specification ang DepEd base sa request sa PS-DBM nga 1.8 gigahertz nga gikusgon ug 4 ka megabytes nga cache.

“So you, Dell Philippines, consciously, you knew that you were supplying a 1.8 gigahertz base speed. Now, if you are now told subsequently after you have delivered the notebooks, the requirement is 1.9 gigahertz base speed… is that part of your warranty?” pangutana pa ni Senate Minority Leader Aquilino “Koko” Pimentel III kang Latinazo.

“No” matud pa ni Latinazo. Niya pa, igo rang nihatag ang Dell sa order. 

Daan nang namulong ang DepEd nga ilisan nila ang mga laptop nga hinay og agi bisan pa man og bag-o pa kining napalit. 

Nigasto og P2.4 billion ang DepED para sa pagpalit og laptop alang sa 39,583 ka mga magtutudlo. Apan ang Commission on Audit nagkanayon nga ang maong mga laptop gawas sa mahal, dul-an P60,000 ang usa, karaan pa gyud.